'Beɔ Kea ‑teea kpɔ "i ɛ
2
Dɛɛ ‑tɩ 'blʋa a ‑suua' i ɛ‑?Dɛɛ ‑tɩ nyʋ ‑wee'‑ a wluu 'mii foo" 'ʋn ɛ‑?
2 'Beɔ ‑wi" ‑nɩa 'e 'kmʋ "kpei ɛ, ʋa nyna tʋ 'a bʋ,
nyʋ ‑ʋʋa poa 'blʋa ‑je o ɛ ʋa poɛ wlu ‑tadue ‑wɛe ʋʋ 'je
Tʋ "bo ke ɛɛ' 'beɔ ɛ ‑tea' 'o tʋ o ‑fɔn'.
3 Ʋʋa wlu' ka 'de ba ‑pee ʋʋ 'na:
‑A cɛn ʋʋa' "dbi ‑wee'‑,
‑a po ʋʋa' ‑gbae cɩɩɛ' ‑wee'‑ 'klwa fiin.
4 'Kaa Kea ‑ɛ ‑nɩa 'e jaʋn 'di ɛ,
ɛ tba 'nynɩɛ "i ‑wɛe ɛɛ wlaa ʋʋpʋ‑.
5 'Sʋ ɛ ‑cɛ' ʋʋpʋ‑ "bli 'de 'cɛn 'ʋn,
'sʋ faʋn 'kpa 'de ʋʋpʋ‑ 'ʋn ɛ ‑wɛe ɛ wlu ɛ 'naa:
6 'Mɔ ‑ɔ ‑te' 'o 'ma 'beɔ ‑wɛe 'ɩn poɔ 'cna "jru
'de ɔ 'je 'o Selisalɛmʋ ‑ɛ ‑kweai nɩ‑.
7 'Ma muɛ dɛ ‑ɛɛ wlu Nyɔsoa cɛan ‑tie" 'tmʋa,
Tʋ "bo wlu' 'de 'ʋn ‑pee ka, ɛ 'naa:
‑Ɩn ‑nɩɛ 'ma "ju ‑o,
'ɩn nʋɛ ‑ʋn 'ma "ju 'ʋn 'de ‑sɩanwɩ 'di.
8 ‑Bo ‑ɩn ‑tee' 'ʋn nyʋ "klein
‑nɩa 'nɔ 'kmʋ "kpei i ‑wɛe ‑ɩn ‑je
ʋʋa' 'beɔ nɩ ɛ, 'ma muɛ nʋa'.
'Ma muɛ ‑ʋn 'blʋadinyʋ
‑wee'‑ "klein "nyɩa ‑wɛe ‑ɩn ‑je ʋʋpʋ‑ ‑jeopo.
9 ‑Ma i tbatu ‑ɛ ‑nɩa nɩɩɛ ɛmɛ ‑ɩn ‑je nʋ
‑wɛe ‑ɩn je ʋʋpʋ‑ ja jaa‑ ‑wɛe ‑ɩn ‑je ʋʋpʋ i waa
ka nyɔ ɔ waa mɛ jae i ɛ.
10 Ɛmɛ ‑tɩ, 'blʋajeʋn ao nɩ tɔ' 'di,
aomɔ ‑ɔɔ poa 'blʋa ‑je o ɛ,
ao "tai aoa' ‑cɛi" nyʋ 'je aopʋ ‑je o po.
11 Ao nʋʋ Kea "juɛi 'de ɛɛ' ni' ‑tea' 'ʋn,
sɩɛin' ‑gbʋʋn' ao "kpei 'de 'mʋa‑ nʋʋa' 'ʋn
12 'De "ju ‑mɔ ɛ, ao 'bɛɛ ɔ "i
‑wɛe ɛ je kan' nɩ ɔ je 'cɛn 'kpa
‑wɛe aoa' ma" je i sɔn 'de ‑jeblʋ aoa kpa "i.
'Kaa ɔɔ' 'cɛn 'ɛ ‑kwle "blo 'wlʋ ‑tɩ 'de "jriɛ ‑tɛ due' "i.
Kɩɩn 'mʋa‑ nʋ nyʋ "klein ‑ʋʋa ‑wlɔɔ' sro' o ɛ.